Ҳозирги ўзгаришлар даврида баъзан атрофдаги кишиларда ҳаётдан норозилик кайфиятидаги гап-сўзларни эшитиб қоламиз. Аслини олганда, бизнинг тириклигимиз, эрталаб ишга ёки ўқишга кетиб, кечқурун уйга қайтишимизнинг ўзи бир мўъжиза эканлигини айримлар ўйлаб ҳам кўрмайдилар. Ўпкаси касалланиб, оғир операциядан кейин чиққан Ботир Зокиров ўша куни кундалигига: "Нафас олиш қандай бахт!” деб ёзиб қўйган экан... 

Чуқурроқ ўйлаб қарасак, шукр қилишимиз учун етарли асослар мавжуд. Бир сайтда эълон қилинган, муаллифи номаълум бўлган қуйидаги кичик матн бизнинг нақадар бахтли яшаётганимизни яна бир карра исботлайди.

Агар сиз ибодатингизни бехатар адо эта олсангиз, бунда Сизни таъқиб қилишлари, қўлга олиб қийнашлари ва ўлдиришлари хавф солмаса – билингки, бу борада дунёдаги уч миллиард нафар инсондан кўра бахтлироқ экансиз.

Агар музхонангизда бугунга етгулик озиғингиз бўлса, эгнингизда кийишга бирор нарсангиз бўлса, бугун тунаш учун бирор маконингиз мавжуд бўлса, билингки, Сиз сайёрамиз аҳолисининг 75 фоизига нисбатан бахтлироқ бойроқсиз.

Агар банкда ҳисобингиз, ҳамёнингизда пулингиз, яна чўнтагингизнинг аллақаерида "қора кунга аталган” беш-олти чақангиз бўлса –билингки, Сиз дунёнинг 8 фоизни ташкил этувчи бойлар қаторидасиз.

Агар ота-онангиз ҳаёт бўлсалар ва улар билан бирга яшаётган бўлсангиз – билингки, дунё миқёсида олганда Сиз энг камёб бахтиёр кишилар қаторидасиз.

Агар бошингизни тик тутиб, самимий жилмая билсангиз ва ҳақиқатан ҳам саховат кўрсата олсангиз – демак, Сиз табарруксиз, чунки, бунга кўпчиликнинг имкони бўлса-да, бундай қила олмайдилар.

Агар сиз кимнидир қўлидан ушлашингиз, қучишингиз ёки лоақал кимнингдир елкасига қоқиб қўйишингиз мумкин бўлса – билингки, Сиз кимгадир далда бўлишдек эзгу бахтга муносибсиз.

Агар сиз мана шу сатрларни ўқиётган бўлсангиз, демак Сиз ҳозиргина икки карра бахтиёрсиз: аввало, кимдир Сизга атаб нимадир битибди; қолаверса, Сиз дунёдаги умуман саводсиз бўлган икки миллиард одамдан кўра устунроқсиз.

Сизга хайрли кун тилаймиз!.. Ўз ютуқларингизни яна бир карра ҳисоблаб кўринг ва буни бошқаларга ҳам англатинг. Зеро, бу дунёда ҳар ким ўзининг нақадар бахтли эканини, Ҳазрати Инсон эканини англаб етсин.

"Карвон қўнғироғи” газетасидан олинди.