«Минал фикри ва-ал қалб» деб номланган китобда у аёл тақвоси, мусулмоннинг хотини қандай бўлиши керак, ўша аёлда топиладиган хислатларнинг қайсилари аёлида топилгани ва шу сингариларнинг ҳаммасини жуда ҳам гўзал тарзда гапирган.

Ушбу китобнинг қисқача мазмуни билан боғлиқ бир-иккита гапларни ёзишга қарор қилдим. Рамазон Бутий аёлининг вафотидан сўнг унга мурожаатан бундай деган экан:

«Эй Амира, сен ёруғ дунёни тарк этганингдан кейин ҳам қуёш аввалгидек ўзининг жойидан чиқяпти. Сен билан мен Пайғамбар алайҳи вассаломнинг ҳадислари ҳақида сўзлашиб ўтирадиган уйимизнинг дарчасидан ўша ёруғлик ҳалиям тушяпти.

Биз ёз вақтида салқин излаб, чиқиб анорнинг соясида ўтирардик, ўша анор бу йил ҳам мева қилди. Ўша сен билан мен танийдиган одамлар ҳали ҳам бизнинг уйимизга келиб-кетиб турибди. Сен билан қариндош бўлган одамларнинг ҳаммаси сен вафот қилганингдан кейин уй-уйига қайтиб кетди-ю, илло мен ўзим ғариб бўлиб қолдим.

Сенинг қошу камонингдан кўра гўзалроқ қошу камонларни кўрдим. Сендан кўра чиройлироқ аёллар дунёда борлиги ҳам рост. Илло, мен тахажжудга туриб ибодат қилганимда, орқамда туриб омин дейишларингни соғиндим.

Қуръон ўқиганимда орқамда йиғлаб тинглашларингни соғиндим. Сендай аёлни энди мен тополмайман деб қўрқаман.

Сен қачон гап бошласанг, гапнинг аввалида илоҳим охиратда ҳам исмингиз шундай бўлсин дердинг (Саид дегани бахтли дегани) – шу гапларингни соғиндим. Илоҳим охиратда ҳам исмингиз Саид бўлсин дейишдан ҳеч қачон эринмаслигингни соғиндим.»

Илоҳим, ҳаммамизнинг аёлимиз шундай бўлсин. Уйланмаганларга Аллох субҳана ва таоло шунақасини насиб қилсин. Омин!

Ёрқинжон қори.